De grutte ynternasjonale teaterhit The Curious Incident of the Dog in the Night-Time spilet dit jier yn de notaristún. It Iepenloftspul Jorwert hat spesjaal foar dizze gelegenheid in eigen Fryske en op Fryslân taspitste bewurking makke. Wat hjit: sels op Jorwert!
It bjusterbaarlike foarfal fan de hûn yn de nacht is in oangripende foarstelling mei tagelyk in soad humor.
Ferhaal
Kristian Johan Frâns Boonstra (spile troch Bauke Klaas Haanstra) is 16 jier en wennet yn Jorwert. Hy is autistysk mar wol mar ien ding: krekt as oaren wêze.
Kristian nimt jo yn in yntime mar grutse foarstelling mei yn syn ferhaal, syn wrâld en syn fassinearjende tinken.
Kristian wit alles fan wiskunde, mar hast neat fan minsken. Hy hâldt fan listjes, patroanen en de wierheid. Hy hâldt net fan de kleur giel en wol ek net oanrekke wurde. Hy hat yn syn ientsje noait fierder west as de ein fan de strjitte. As lykwols Bijke, de hûn fan de buorfrou, fermoarde wurdt, wol Kristian op ûndersyk. Hy begjint oan in reis dy't syn feilige wrâld folslein op 'e harsens set. Hy komt achter folle mear as inkeld de dieder fan de moard op Bijke.
It Foarfal is in komysk drama en in thriller yn ien. It is it oangripende ferhaal fan in autistyske jongen dy't jo meinimt yn syn tinken. As jo Kristian yn jo hert slute, sil hy jo de eagen iepenje.
Ledskermen
Om te ferbyldzjen hoe't Kristian tinkt, litte wy syn tinzen sjen op fiif grutte, bewegende ledskermen.
It jout ús de mooglikheid om yn it geniale brein fan Kristian te kommen.
It belooft in fisueel mega-spektakel te wurden!
Hjirûnder fine jo in oersjoch fan de meiwurkers fan it Iepenloftspul Jorwert.
Besjoch meiwurkers
