Iepenloftspul Jorwert bringt It Feest

It Iepenloftspul Jorwert bringt dit jier in eigen bewurking fan de film Festen. Under de titel 'It Feest' spylje de Jorwerters it yntrigearjende ferhaal oer famyljegeheimen, in ferhaal fol lilkens en lawaai mar mei in grûntoan fan hoop en leafde.

Heit wol syn fiifensechtichste jierdei net samar foarbygean litte. Hy pakt út mei in grut feest yn syn hús. It mei oan neat mankeare. Mar der leit in skaad oer de dei, om't de âldste dochter har in heal jier lyn tekoart dien hat. Dochs moat it feest trochgean. De gasten krije it bêste miel, de measte drank en prachtmuzyk foarset. It haadgerjocht komt lykwols fan de âldste soan at dy in boekje iependocht oer de tsjustere kant fan heit, in kant dy't gjinien ferwachtet. Is it wier of fersint de fantasyfolle Kristian dizze ûnbekende haadstikken?

'It Feest' yn Jorwert betsjut emoasjes: lyts gûle mar ek breedút laitsje en meilibje mei de famyljeleden dy't spile wurde troch âlde bekenden en de nije talinten dy't de lêste jierren flink de kop opstutsen ha yn de Notaristún fan Jorwert. De foarstellings fine plak yn de lêste wike fan augustus en de earste trije wike fan de moanne septimber. De kaartferkeap set út ein op 1 juny 2010 fia dizze webside. De kommende tiid hâlde we jo troch ús webside folslein op de hichte fan de ûntwikkelings yn de Notaristún.